كان ياماكان
عشه وشجرة وضليله
ولمه حلوه وجميله
وبركة ميه
بترقص فيها الشمس
ساعة الضهريه
ونسمة خفيفه وشقيه
خدت العقل وهى معديه
ولقمة هنيه وطبليه
وقلة ميه بتروى القلب
زى الارض العطشانه
وهى سعيده وفرحانه
ساعة ماتعدى الميه
وقمر يلالى ساعة الأدان
وصوت الادان
الله اكبر الله اكبر
تلاقى الكل بيكبر
وساعه طلع النهار
مالقينا العشه ولا الشجرة
هدوا العشه وأطعوا الشجرة
وفضلت بس الضليله
ولما سألنا
مين ياولاد
هد العشه وقطع الشجره
قالوا ده ظالم
فى نص الليل
سرق البسمه
بهد العشه
وهد عزيمه
بقطع الشجره
وفضلت بس الضليله
الضليله دى كانت بلدى
الضليله حميها ربى
وان كان على العشه هانبنيها
والشجره راح نزرع غيرها
وبمية بلدى نرويها
وتعيش ياولاد الضليله
وتعالوا نتلملم فيها
نبنيها ونخضر فيها
ودايما تحيا الضليله
بلدى والمولى حاميها
.
.
د.همس حجازى
ليست هناك تعليقات:
إرسال تعليق